உலக மனநல விழிப்புணர்வு தினம்: மனதையும் உடலையும் பேணுவோம்
ஒவ்வொரு ஆண்டும் அக்டோபர் 10-ஆம் தேதி உலக மனநல விழிப்புணர்வு தினமாக உலகளவில் கொண்டாடப்படுகிறது. உடலும் மனமும் ஒன்றோடு ஒன்று பின்னிப் பிணைந்தவை. ஆழியில் இருந்து மேகங்கள் உருவாவது போலவும், மேகங்கள் உருகி ஆழியில் கலப்பது போலவும், உடலில் ஏற்படும் பிரச்சனைகள் மனதில் எதிரொலிக்கின்றன; மனதில் ஏற்படும் கோளாறுகள் உடலில் பிரதிபலிக்கின்றன.
RelatedPosts
நம் உடலில் மூளை கபால ஓட்டிற்குள் இருப்பது தெரிந்தாலும், “மனம்” எங்கே உள்ளது என்பது இன்னும் மர்மமாகவே உள்ளது. ஆனால், மனம் என்ற ஒன்று அனைவருக்கும் உள்ளது என்பதை யாரும் மறுக்க முடியாது. ஒரு செயலில் லயித்து வேலை செய்ய “மனமிருந்தால் மார்க்கமுண்டு” என்று கூறுவோம். உதவி செய்பவரை “பெரிய மனசுக்காரர்” என்று பாராட்டுவோம். சோகத்தில் “மனசு வலிக்குது” என்றும், பிரிவுத்துயரில் “மனசு தவிக்குது” என்றும் சொல்வோம். இவை அனைத்தும் மனதின் இருப்பை உணர்த்துகின்றன.
மனநலப் பாதிப்புகள்: ஒரு பார்வை
முன்னொரு காலத்தில் மனநலக் கோளாறுகள் ஊழ்வினையாகவோ, ஊறாகவோ கருதப்பட்டன. ஆனால், இன்று அறிவியல் முன்னேற்றம் மனநலப் பாதிப்புகள் யாரையும் தாக்கக்கூடும் என்பதை உறுதிப்படுத்தியுள்ளது. மூளையில் உற்பத்தியாகும் ரசாயனங்களின் ஏற்ற இறக்கங்கள், மூளையில் ஏற்படும் தேய்மானங்கள் ஆகியவை மனநலப் பிரச்சனைகளுக்கு முக்கிய காரணங்களாக உள்ளன.
இவற்றை மருத்துவ சிகிச்சை மூலம் கட்டுப்படுத்த முடியும். மனநல மருத்துவரை அணுகுவது, அவர் பரிந்துரைக்கும் மருந்துகளை உட்கொள்வது, மன ஆற்றுப்படுத்தல் சிகிச்சைகளைப் பின்பற்றுவது ஆகியவை மனநலப் பாதிப்புகளில் இருந்து விரைவில் மீள உதவும்.
மனநலப் பிரச்சனைகளின் அறிகுறிகள்
மனநலப் பாதிப்புகள் பல வடிவங்களில் தோன்றலாம். உறக்கக் கோளாறு (Insomnia), கற்றலில் குறைபாடு (Learning Disorder), சிந்தனைத் திறனில் பிரச்சனை (Dissociation of Thought Process), முடிவெடுக்கும் திறனில் கோளாறு, நினைவு மழுங்குதல் (Dementia), புலப்படாதவை புலப்படுவது போன்ற மாயத்தோற்றங்கள் (Illusion), கேட்கப்படாத குரல்கள் கேட்பது (Auditory Hallucination), தவறான நம்பிக்கைகள் (Delusion), பயம் அல்லது பதற்றம் (Anxiety/Panic Disorder), மது அல்லது போதைப் பழக்கங்கள் (Addiction), தற்கொலை எண்ணங்கள் (Suicidal Thoughts) ஆகியவை மனநலப் பிரச்சனைகளின் அறிகுறிகளாக இருக்கலாம். இவை தென்பட்டால் உடனடியாக மனநல மருத்துவரை அணுகுவது அவசியம்.
மனநலத்தைப் பேணுவோம்: சமூகத் தடைகளை உடைப்போம்
நம் சமூகத்தில் மனநலப் பிரச்சனைகளைப் பற்றி பேசுவதற்கு இன்னும் கூச்சமும், வெட்கமும், அச்சமும் நிலவுகின்றன. ஆனால், இவை தேவையற்றவை. காய்ச்சல், சளி, நீரிழிவு, ரத்தக் கொதிப்பு போன்ற உடல் நலப் பிரச்சனைகளுக்கு மருத்துவரை அணுகுவது போலவே, மனநலப் பிரச்சனைகளுக்கும் மருத்துவ உதவி பெறுவது இயல்பானதாகக் கருதப்பட வேண்டும். மனநல மருத்துவரையோ, உளவியல் நிபுணரையோ அணுகுவது இனி சமூகக் களங்கமாக இருக்கக் கூடாது.
மனநலம்: ஒரு அடிப்படை உரிமை
ஒருவர் நலமுடன் இருக்கிறார் என்பது அவரது உடல் நலத்தை மட்டும் வைத்து முடிவு செய்யப்படுவதல்ல. உடல் நலம், மனநலம், சமூகத்திற்கு அவர் ஆற்றும் பங்களிப்பு, சமூகம் அவரைப் பற்றி கொண்டிருக்கும் பார்வை ஆகியவை ஒருங்கிணைந்து ஒருவரின் முழுமையான நலத்தை வரையறுக்கின்றன.
இதனால், மனநலம் குறித்த விழிப்புணர்வு மற்றும் மனநல சிகிச்சைகள் அனைவருக்கும் பாகுபாடின்றி கிடைப்பது அடிப்படை உரிமையாகும். இந்த உலக மனநல விழிப்புணர்வு தினத்தில், மனதையும் உடலையும் சமமாகப் பேணுவோம்; மனநலப் பிரச்சனைகளைப் பற்றிய களங்கத்தை உடைப்போம்; ஆரோக்கியமான வாழ்க்கைக்கு வழி வகுப்போம்!
மனநலம் முதலிடம்!
