‘புதிய கல்விக் கொள்கை ஆரிய கருத்தியலின் தொடர்ச்சி’
சென்னை: ‘கல்வியில் சிறந்த தமிழ்நாடு’ விழாவில் பேசிய தியாகராஜன் குமாரராஜா, புதிய கல்விக் கொள்கையை ஆரிய கருத்தியலின் நவீன வடிவமாக விமர்சித்தார். திராவிட கருத்தியல் அனைவருக்கும் கல்வி வழங்குவதை வலியுறுத்துவதாகவும், ஆரிய கருத்தியல் அதற்கு எதிராக பாகுபாடு காட்டுவதாகவும் அவர் கூறினார்.
RelatedPosts
மகாபாரதத்தில் துரோணாச்சாரியார், ஏகலைவனிடம் அவன் சாதியைக் கேட்டு கல்வி கற்பிக்க மறுத்ததையும், பின்னர் அவனது கட்டை விரலை வாங்கியதையும் உதாரணமாகக் குறிப்பிட்டார். அதேபோல், கர்ணன் கிருபாச்சாரியாரிடம் தனது பிறப்பை மறைத்து கல்வி பெற்றபோது, உண்மை தெரிந்தவுடன் அவருக்கு சாபம் கொடுக்கப்பட்டதையும் அவர் சுட்டிக்காட்டினார்.
“துரோணாச்சாரியார், கிருபாச்சாரியார் முதல் ராஜகோபாலாச்சாரியார் வரை, கல்வியைத் தடுக்கும் முயற்சிகள் தொடர்கின்றன. இதன் இன்றைய வடிவம்தான் புதிய கல்விக் கொள்கை,” என்று தியாகராஜன் குமாரராஜா கடுமையாக விமர்சித்தார். இந்தக் கொள்கை, கல்வியில் சமத்துவத்தை மறுக்கும் வகையில் உள்ளதாகவும், திராவிட கருத்தியலின் அனைவருக்கும் கல்வி என்ற கோட்பாட்டுக்கு எதிராக இருப்பதாகவும் அவர் வாதிட்டார்.
இந்த விழாவில் கல்வியில் தமிழ்நாட்டின் முன்னேற்றம் மற்றும் சவால்கள் குறித்து பலரும் கருத்து தெரிவித்தனர். தியாகராஜனின் பேச்சு, புதிய கல்விக் கொள்கை குறித்து மீண்டும் விவாதங்களைத் தூண்டியுள்ளது.
