விஜய் பிரசார பயணம் – லோகோ வெளியீடு:
RelatedPosts
சென்னை, செப். 12: 2026 சட்டசபைத் தேர்தலை முன்னிட்டு தமிழக வெற்றிக்கழகம் (த.வெ.க) தலைவர் நடிகர் விஜய், தனது பிரசார சுற்றுப்பயணத்தை நாளை (செப். 13) திருச்சியில் தொடங்குகிறார். இந்த சுற்றுப்பயணத்தை ‘மக்களுடன் சந்திப்பு’ என்று பெயரிட்டுள்ள த.வெ.க., அதற்கான சிறப்பு லோகோவை இன்று வெளியிட்டது. ‘உங்கள் விஜய் நா வரேன்’ என்ற தலைப்புடன் அமைக்கப்பட்ட இந்த லோகோவில், ‘வாகைசூடும் வரலாறு திரும்புகிறது’ என்ற உற்சாகமான வாசகம் இடம்பெற்றுள்ளது. இது விஜயின் அரசியல் பயணத்தின் புதிய அத்தியாயத்தை குறிக்கிறது.
திருச்சியின் ஸ்ரீரங்கம் பகுதியில் இருந்து சுற்றுப்பயணத்தைத் தொடங்கவுள்ள விஜய், முதல் கட்டமாக டெல்டா மாவட்டங்களைச் சுற்றி பிரசாரம் செய்ய உள்ளார். இந்த சுற்றுப்பயணம் செப்டம்பர் 13 முதல் டிசம்பர் 20 வரை 10 வாரங்கள் நீடிக்கும் என தெரிகிறது. சனிக்கிழமைகளில் மட்டுமே பிரசாரம் மேற்கொள்ளும் வகையில், ஒரே நாளில் 3 முதல் 4 மாவட்டங்களை உள்ளடக்கியது இந்த திட்டம். முதல் வாரத்தில் திருச்சி, பெரம்பலூர், அரியலூர், நாகை, திருவாரூர், மயிலாடுதுறை, திருவள்ளூர் ஆகிய மாவட்டங்களில் சந்திப்புகள் நடைபெறும்.
இந்த சுற்றுப்பயணத்தின் போது, உள்ளூர் மக்கள் பிரச்சினைகளை முன்வைத்து அரசு மற்றும் கட்சித்தலைவர்களை விமர்சிக்கும் திட்டமும் உள்ளது. திருச்சியில் டி.வி.எஸ் டோல்கேட் பகுதியில் இருந்து சத்திரம் பேருந்து நிலையம் வழியாக காந்தி மார்க்கெட் வரை பிரசாரம் மேற்கொள்ள அனுமதி பெற்றுள்ள த.வெ.க., காவல்துறையின் 23 நிபந்தனைகளை ஏற்றுக்கொண்டுள்ளது. இதில், பிரசார வாகனத்தில் நின்று பேசுவதற்கு தடை, காருக்குள் இருந்து பயணம் செய்ய வேண்டும் என்பன உள்ளடங்கும். இருப்பினும், ‘தடைகளை கடந்து வெற்றியை நோக்கி முன்னேறுவோம்’ என விஜய் தனது கட்சியினருக்கு உத்தரவிட்டுள்ளார்.
இந்த லோகோ வெளியீட்டுடன், த.வெ.க. தனது அரசியல் பிரசாரத்தை தீவிரப்படுத்தி வருகிறது. 2026 தேர்தலில் தமிழகத்தில் புதிய மாற்றத்தை ஏற்படுத்துவதே இதன் முக்கிய இலக்கு. விஜயின் ரசிகர்கள் மற்றும் கட்சி ஆதரவாளர்கள் இந்த சுற்றுப்பயணத்தை எதிர்பார்த்து வருகின்றனர்.
