திருச்செந்தூர் கோயில் லஞ்ச விவகாரம்: “அடிப்படை மாற்றங்கள் தேவை” – தமிழக அரசை கேள்வி எழுப்பிய நயினார் நாகேந்திரன்
சென்னை: திருச்செந்தூர் சுப்பிரமணிய சுவாமி கோயிலில் தரிசனத்திற்காக ரூ.4,000 லஞ்சம் பெற்றதாக குற்றம்சாட்டப்பட்டவர்களுக்கு எதிராக இந்து சமய அறநிலையத்துறை அமைச்சர் ரமேஷ் நடவடிக்கை எடுத்திருப்பது வரவேற்கத்தக்கது என தமிழக பாஜக மாநிலத் தலைவர் நயினார் நாகேந்திரன் தெரிவித்துள்ளார்.
RelatedPosts
இது தொடர்பாக அவர் தனது எக்ஸ் (X) சமூக வலைதளப் பதிவில், இந்த விவகாரத்தில் உயர்மட்ட அதிகாரிகளுக்கு எந்தவித தொடர்பும் இல்லை என்பதை அரசு எவ்வாறு உறுதி செய்தது என்ற கேள்வியை எழுப்பியுள்ளார்.
மேலும், முந்தைய திமுக ஆட்சிக் காலத்தில் இந்து சமய அறநிலையத்துறையில் ஊழல் குற்றச்சாட்டுகள் அதிகரித்ததாகக் கூறிய அவர், தற்போதைய தவெக அரசு துறையின் செயல்பாடுகளை மேம்படுத்த எந்த அடிப்படை நிர்வாக மாற்றங்களை மேற்கொண்டுள்ளது என்பதையும் விளக்க வேண்டும் என வலியுறுத்தியுள்ளார்.
கோயில் தரிசன முறைகேடுகளைத் தடுக்க “ஆன்லைன் ஸ்லாட்” போன்ற புதிய நடைமுறைகள் மட்டும் போதுமானதல்ல என்றும், முறைகேடுகளுக்கு வழிவகுக்கும் நிர்வாக குறைபாடுகளை நீக்கும் வகையில் துறைரீதியான சீர்திருத்தங்கள் அவசியம் என்றும் அவர் குறிப்பிட்டுள்ளார்.
இந்து சமய அறநிலையத்துறையை வெளிப்படைத்தன்மை மற்றும் பொறுப்புணர்வுடன் செயல்படும் அமைப்பாக மாற்ற, அரசு அடிப்படை கட்டமைப்பு மற்றும் நிர்வாக சீர்திருத்தங்களை முன்னெடுக்க வேண்டும் என நயினார் நாகேந்திரன் வலியுறுத்தியுள்ளார்.
