திமுக – அதிமுக கூட்டணி குறித்த குற்றச்சாட்டு: அமைச்சர் ஆதவ் அர்ஜுனா பரபரப்பு பேச்ச
தமிழக அரசியலில் புதிய சர்ச்சையை கிளப்பும் வகையில் அமைச்சர் ஆதவ் அர்ஜுனா வெளியிட்டுள்ள கருத்துகள் அரசியல் வட்டாரங்களில் பரபரப்பை ஏற்படுத்தியுள்ளன. மாற்றுக் கட்சியிலிருந்து தவெகவில் இணைந்த நிர்வாகிகள் மற்றும் தொண்டர்களை வரவேற்கும் நிகழ்ச்சியில் பேசிய அவர், திமுக மற்றும் அதிமுக இடையே மறைமுக அரசியல் புரிந்துணர்வு இருந்ததாக குற்றஞ்சாட்டினார்.
RelatedPosts
அவர் பேசியதாவது:
“புதுச்சேரியில் அதிமுக எம்.எல்.ஏக்களிடம், எடப்பாடி பழனிசாமி முதல்வராக ஆதரவு அளிப்பதாக கையெழுத்து வாங்கப்பட்டதாக தகவல்கள் வந்தன. ஆனால் வெறும் 47 எம்.எல்.ஏக்களை வைத்துக்கொண்டு ஈபிஎஸ் எவ்வாறு முதல்வராக முடியும் என்ற கேள்வி எழுந்தது. பின்னர்தான் அதன் பின்னணியில் வேறு அரசியல் திட்டம் இருந்தது தெரியவந்தது. உதயநிதி ஸ்டாலின் முதல்வராகவும், ஈபிஎஸ் துணை முதல்வராகவும் அமைய ஒரு அரசியல் சூழ்ச்சி நடந்ததாக கூறப்பட்டது. அந்த முயற்சியை முதன்முதலில் எதிர்த்தது கம்யூனிஸ்ட் கட்சிகளும், விடுதலை சிறுத்தைகள் கட்சியும் தான்,” என்றார்.
மேலும் அவர் கூறுகையில், “செங்கோட்டையன் தவெகவில் இணைந்தபோது, தவெக ஒரு சிறிய கட்சி என விமர்சனங்கள் முன்வைக்கப்பட்டன. ஆனால் இன்று தமிழக அரசியலில் மக்கள் மாற்றத்தை விரும்புகின்றனர். அரசியல் கட்சிகளில் இருந்த நிதி முறை மற்றும் பழைய அதிகார அமைப்புகள் மக்கள் மத்தியில் நம்பிக்கையை இழந்துள்ளன,” என தெரிவித்தார்.
அதேவேளை, “தேர்தல் முடிவுகள் வெளியான அன்றே திமுக மற்றும் அதிமுக இடையே கூட்டணி தொடர்பான பேச்சுவார்த்தைகள் நடைபெற்றதாக அரசியல் வட்டாரங்களில் பேசப்பட்டது. இதனால் அதிமுக தொண்டர்கள் கடும் மனவருத்தத்திற்கு உள்ளாகினர்,” என்றும் அவர் குற்றம்சாட்டினார்.
பாஜகவுடன் கூட்டணி அமைத்து சந்தித்த தோல்விகளை கூட அதிமுக தொண்டர்கள் அமைதியாக ஏற்றுக்கொண்டதாக கூறிய ஆதவ் அர்ஜுனா, “ஆனால் திமுக – அதிமுக இணைந்து செயல்பட்டதாக ஏற்பட்ட நம்பிக்கை இழப்பு, அதிமுகவின் அடித்தள தொண்டர்களை வேதனைக்குள்ளாக்கியது. ஜெயலலிதா இனி இல்லை என்ற உணர்வு அவர்களிடம் உருவானது. அதனால்தான் பலர் தவெகவில் வந்து இணைந்தனர்,” என்று பேசினார்.
அமைச்சர் ஆதவ் அர்ஜுனாவின் இந்த கருத்துகள் தமிழக அரசியலில் புதிய விவாதங்களை உருவாக்கியுள்ளன. குறிப்பாக திமுக மற்றும் அதிமுக இடையே அரசியல் தொடர்பு இருந்ததாக அவர் முன்வைத்த குற்றச்சாட்டுகள் அரசியல் அரங்கில் எதிரொலியை ஏற்படுத்தியுள்ளது.
