மும்பை, ஜூலை 17, 2025: பாலிவுட் மற்றும் தமிழ் திரையுலகில் புகழ்பெற்ற நடிகையான மனிஷா கொய்ராலா, இங்கிலாந்திலுள்ள பிராட்போர்டு பல்கலைக்கழகத்தால் (University of Bradford) கௌரவ டாக்டர் பட்டம் வழங்கி கௌரவிக்கப்பட்டுள்ளார். இந்த அரிய மதிப்புமிக்க விருது, அவரது திரைப்பயணம், வாழ்க்கையில் அவர் காட்டிய விடாமுயற்சி, புற்றுநோயை எதிர்கொண்ட துணிச்சல் மற்றும் சமூக சேவை ஆகியவற்றை அங்கீகரிக்கும் வகையில் வழங்கப்பட்டது.
நேபாளத்தில் பிறந்து இந்திய திரையுலகில் தனது தடத்தை பதித்த மனிஷா கொய்ராலா, 1989-ல் வெளியான நேபாள மொழி படமான பெரி பெட்டாலா மூலம் தனது திரைப்பயணத்தை தொடங்கினார். 1991-ல் சௌடாகர் என்ற ஹிந்தி படத்தின் மூலம் பாலிவுட்டில் அறிமுகமானார். தமிழில் பாம்பே (1995), இந்தியன் (1996), உயிரே (1998) உள்ளிட்ட படங்களில் தனது நடிப்பாற்றலை வெளிப்படுத்தியவர். சமீபத்தில், சஞ்சய் லீலா பன்சாலியின் ஹீராமண்டி வெப் தொடரில் மனிஷாவின் நடிப்பு பெரும் பாராட்டை பெற்றது.
RelatedPosts
இந்த கௌரவ டாக்டர் பட்டத்தை பெற்ற பிறகு, மனிஷா கொய்ராலா தனது இன்ஸ்டாகிராம் பக்கத்தில் நன்றி தெரிவித்து உருக்கமான பதிவு ஒன்றை வெளியிட்டார். “இந்த கௌரவம் எனது வாழ்க்கையில் ஒரு முக்கியமான தருணம். எனது பயணத்தில் கடின உழைப்பு, தோல்விகள், மீட்சி மற்றும் சேவையின் மூலம் கற்ற பாடங்களை இந்த பட்டம் அங்கீகரிக்கிறது,” என்று அவர் குறிப்பிட்டார். மேலும், தனது மறைந்த பாட்டி சுஷீலா கொய்ராலாவுக்கு இந்த விருதை அர்ப்பணித்து, அவரை தனது “முதல் ஆசிரியர்” என்று உணர்ச்சி பொங்க குறிப்பிட்டார்.
மனிஷாவின் வாழ்க்கை பயணம், 2012-ல் புற்றுநோய் பாதிப்பு கண்டறியப்பட்டபோது அவர் எதிர்கொண்ட சவால்களையும் உள்ளடக்கியது. அமெரிக்காவில் தொடர் சிகிச்சை மூலம் மீண்டு வந்த அவர், 2020-ல் காத்மாண்டுவில் *மனிஷா கொய்ராலா புற்றுநோய் கல்வி நிதி* என்ற திட்டத்தை தொடங்கி, புற்றுநோயால் பாதிக்கப்பட்ட ஏழை குழந்தைகளுக்கு கல்வி உதவித்தொகை வழங்கி வருகிறார்.
பிராட்போர்டு பல்கலைக்கழகத்தின் இந்த கௌரவம், மனிஷாவின் கலை மற்றும் சமூக பங்களிப்புகளை உலகளவில் அங்கீகரிக்கும் ஒரு மைல்கல் என பலரும் பாராட்டி வருகின்றனர். இந்த நிகழ்வில், பிரபல ஆடை வடிவமைப்பாளர் டேனியல் லீ உட்பட பலரும் கௌரவிக்கப்பட்டனர் என்று பல்கலைக்கழகம் தெரிவித்துள்ளது.
மனிஷா கொய்ராலாவின் இந்த சாதனை, அவரது ரசிகர்கள் மற்றும் திரையுலகினரிடையே பெரும் மகிழ்ச்சியை ஏற்படுத்தியுள்ளது.
